Преплет е повеќе од концепт продавница или дизајн студио – живописен спој на оптимизам и инспирација, кој потсетува дека малите работи го прават моментот голем. Викторија Ланговска Хајредин, Магдалена Аврамовска и Емилија Ланговска, визионерското трио зад Преплет, нивната страст кон креативноста и нивната посветеност на создавање на уникатни искуства го направија Преплет омилена дестинација и извор на инспиративност во срцето на Дебар Маало.

Основан во 2013 година од страна на Викторија и Магдалена, Преплет започна како платно за илјадници илустрации, креативни пораки и фрази, секоја од нив со огромна симболика и моќ во изразот. Во 2018 година, Емилија се приклучи на тимот, додавајќи ја нејзината уникатна перспектива и експертиза во дизајн, маркетинг и проект менаџмент. Заедно, Викторија, Магдалена и Емилија ја формираат управувачката структура на Преплет, водејки го кон растење и безусловно се грижат да остане светилник на креативност и позитивност.

Денес, Преплет брои посветен тим од пет членови, поддржан од мрежа на надворешни соработници. Со фокус на инклузивноста, иновацијата и уживањето во креирањето Преплет продолжува да ги инспирира многумина да најдат својот совршен и уникатен подарок – за себе или своите најблиски.

Спектарот на производи кои се дел од рафтовите на Преплет постојано расте и се менува. Како дел од концепт продавницата Преплет остварува соработки и со други помали креативни студија и дизајнери, со цел да се овозможи пласман и на нивните производи и да се надополни целосното искуство на купувачите.

Покрај сопствените колекции, во делот на корпоративни подароци Преплет има дизајнирано и остварено многу успешни соработки со поголеми фирми меѓу кои: Уни Банка, CMX, Dept Agency, Sopro, Singular, Авицена, Искрател, Инскејл, Протонлаб, Ред Бул, Космо, Кафе-книжарница „Три“, Литература, Портрет Магазин, Имика, Хера, Арно, Рош, Шпаркасе банка, Халк Банка, Телеком, Публицис, ФИТР и др. Покрај проширување на нашата продажна мрежа, соработките вклучуваат и дизајн услуги, како изработка на постери, плакати, брошури, дизајн на амбалажи, логоа и брендирање, корпоративни подароци, изработка на излози, дизајн консултации и слично.

„Нашата цел при дизајнирањето е да создадеме дизајни и производи преку кои секој ќе може да си се поврзе на свој и индивидуален начин. Секој наш производ носи автентична порака на себе и има задача да остане парче кое ќе отсликува момент вреден за паметење.“